“මුතු අකුරට පෙර” නමින් පොත් 12කින් සමන්විත පොත් පෙළක් වයස අවුරුදු 3-5ත් අතර පොඩිත්තන් වෙනුවෙන් නිර්මාණය කර ඇත. මෙය ඉන් පළමු පොතයි.

මුතු අකුරට පෙර – පළමු අදියර – ඉලක්කම්

වයස අවුරුදු 3-4 අතර දරුවන්ට 1 සිට 5 දක්වා ඉලක්කම් හඳුනා ගැනීම, ගණන් කිරීම සහ ඉලක්කම් පිළිබඳ අවබෝධය දරුවාගේ මනසේ තහවුරු කිරීමේ අරමුණින් මෙම පොත සම්පාදනය කර ඇත.

ගණිතය ප්‍රායෝගික විෂයකි. ජීවිතයේ බොහෝ අවස්ථාවල ගණිතය ප්‍රයෝගිකව යොදා ගැනීමට අවස්ථාවක් උදාවේ.

නිවස ආශ්‍රිත කටයුතුවලදි ඔබගේ දරුවාට ප්‍රියජනක වන ලෙස ඉලක්කම් පිළිබඳ ප්‍රායෝගික අත්දැකීම් රැසක් ලබා දීමට අවස්ථාව සලසා දිය හැකිය.

උදා –

● නිවසට ගෙනෙන එළවළු පලතුරු ගණන් කිරිම.

● ගල් කැට ගණන් කිරිම.

● ගෙවත්තේ මල් ගණන් කිරිම.

● නගින බසින පඩි ගණන් කිරීම.

මේ ආකාරයෙන් දරුවා ප්‍රායෝගික ක්‍රියාකාරකම්වල නිරත වන සැම අවස්ථාවකදී ම දරුවා ඇගයීම තුළින් දරුවාගේ ආත්ම අභිමානය වර්ධනය කළ හැකිය. දරුවා ඇලුම් කරන ද්‍රව්‍යමය දිරිගැන්වීම් වෙනුවට සමාජීය දිරිගැන්වීම ඉතාමත් වැදගත් වේ. උදාහරණ ලෙස හිස පිරිමැදීම, සිනහව, ආදරය, හිස නවා සතුට පල කිරිම, තරු ලබා දිම. අත්පොළසන් හඬක් ලබා දීම යනාදිය දැක්විය හැකිය. මේ ආකාරයට දරුවාට ප්‍රියජනක ලෙස සැබෑ අත්දැකීම් යොදා ගනිමින් ක්‍රියාකාරකම්වල නිරතවීම මගින් ඉලක්කම් පිළිබඳ අවබෝධය මනසේ තහවුරු කළ හැකිය.

මුල් ළමා වියේ දී නිවැරදි ලෙස ගණිත කුසලතා දියුණු කිරීමෙන් පාසලේ දී ගණිත විෂය ප්‍රියජනක වනවා සේම එය පහසුවෙන් ග්‍රහණය කර ගැනීමට ද දරුවාට අවස්ථාව ලැබේ.